اطبع هذه الصفحة

http://www.saaid.net/daeyat/sara/103.htm?print_it=1

سلسلة مقالات
حكايات الحجة (1)

سارة بنت محمد حسن


حكايات الحجة


- يا خبر ألوان!!
جبتي منين الكلام ده يا حجة؟؟
-
**من البرامج اللي بشوفها في التليفزيون أصلي لازم أسمع الشبهات دي عشان أفهم!
-
**من أصحابي أصل عندهم شبهات وانا بحاول أرد عليها
-
**أصلي يابنتي بقيت بدخل منتديات وجروبات الفيس عشان أناظر الملحدين والنصارى وكدة يعني عشان أنصر الإسلام وكدهون بقة أنت عارفة

يا حجة
- ينفع واحد عنده أنيميا يتبرع بالدم؟؟
- لا
- ينفع واحد مش بيعرف يعوم ينط في النيل عشان ينقذ صاحبه وبعدين يصرخ وميلاقيش حد ينقذه لا هو ولا صاحبه ويموتوا سوا؟
- لا
- برضه مينفعش حد يتصدر للمناظرة ولا يعرض نفسه للشبهات إلا لما يكون عنده علم!

والعلم يا حجة بيتاخد بالتدريج
عشان ميجلجيش زغطة تخلص عليك وتجيب أجلك

محدش مسئول وقتها عن ضلالك يا حجة ...أنت اللي مسئولة

-----------------

حكايات الحجة

- اسسسكتي يا بنتي
- خييييييييير يا حجة
- مش طلع الحجاب مش فرض
- لا والله
- أه أصلنا لازم نراجع الموروث ونعيد تقييمه مش كل حاجة أهالينا علموهالنا تبقى صح
- شوفي يا حجة أنت بقة
~~~~
بقالنا 1400 سنة اللي تمشي بحجاب تبقى مسلمة اللي من غير حجاب ممكن تبقى "مسلمة عاصية" وممكن تبقى تبع أي ملة تانية
الغرب كله عارف أن المسلمات بيلبسوت حجاب
ده مش مجرد فرض يا حجة
ده شعيرة من شعائر الإسلام ...اللي بتعمله بيتعرف أنها مسلمة
زي ما الراهبة بلبسها وصليبها بتتعرف أنها مسيحية مش بوذية ولا مسلمة!
بالعربي :
الحجاب معلوم من الدين بالضرورة
نظام جبت الديب من ديله وطلعت بافتكاسة جديدة لا علماء المسلمين ولا عوام المسلمين على مدار 14 قرن عرفوها معناه حاجة واحدة:

إنهم يتبعون دينا جديدا ...بس ده مش دين محمد صلى الله عليه وسلم

----------------------------

حكايات الحاجة

- طلع الانتحار* كبيرة مش كفر يا بنتي ...يعني عااااادي معصية من اللي بنعملها كل يوم دي
- لا يا حاجة بجد صحيح
على كدة أنت متعودة بقة يا حاجة على الكبائر وكدة يعني كل يوم سرقة وزنا وكدة يعني؟؟ ومؤخرا يعني متعودة كل يوم تنتحري وكدة يعني؟؟
- لا يابتي مش القصد
- وأما هو مش القصد أيه اللي يخليك تكتبي كلام يتفهم كدة؟؟!
---
قال النبي صلى الله عليه وسلم
"وإنَّ العبدَ ليتكلَّمُ بالكلمةِ من سخطِ اللهِ ، لا يُلقي لها بالًا ، يهوي بها في جهنَّمَ" صحيح البخاري
-
فتاوى وخبط في الكلام وتهوين من الكبائر وعلى الصعيد الثاني شهادات بتتوزع بالجنة والنار
-
قال النبي صلى الله عليه وسلم:"وهل يكب الناس في النار على وجوههم، أو على مناخرهم، إلا حصائد ألسنتهم" صحيح الترمذي
---
*حكم الانتحار أنه من أكبر الكبائر وليس فقط كبيرة بل هو من السبع الموبقات كما في حديث البخاري ذكر من الموبقات قتل النفس التي حرم الله
أما الكلام على المعينين فله وضع آخر ومن مات مسلما أمسك لسانك عنه إلا بدعوة صالحة

---------------------------------------

حكايات الحجة

===========
- شفتي يابنتي البتاع اللي أنا لابساه ده؟
- أيه ه يا حجة؟؟
- ده سوار بقة الطاقة بيظبط المزاج وكدة
- يعني ايه يا حجة دي حاجة علمية يعني؟؟
- بيقولوا
- بيقولوا أيه
- بيقولوا بيخرج الطاقة السلبية من الجسم فبيبقى صحي وكدة
- أه يعني مين اخترعه؟ عالم فيزياء؟ عليه تجارب علميه
- لا مش كدة بالظبط يعني
- والطاقة السلبية دي بتتقاس؟ لها تجارب علمية؟؟
- لا مش بالظبط يعني برضه
- شوفي يا حجة:
اتخاذ سبب غير حسي (يعني مش علمي ولا تجريبي) ولا شرعي = فهو شرك أو ذريعة للشرك
========
يا حجة مفيش فرق بين السوار ده وبين التمائم والمعلقات
قال النبي صلى الله عليه وسلم:"من تعلق شيئا وكّل إليه "
وقال :"من علق تميمة فقد أشرك "
وقال :"إن الرقى والتمائم والتولة شرك"
----------
اللي عاوزة تفهم ليه الطاقة الكونية دي مش علم تجريبي ولا شيء مشروع تقرأ المقالة دي
علم الطاقة الباطني
فوز الكردي
http://ar.islamway.net/…/%D8%AD%D9%82%D9%8A%D9%82%D8%A9-%D8…

-----------------------------

حكايات الحجة

============
-- يااااه يابنتي أنا عرفت ناس كثير بس ...
أنت أحلى منتقبة شفتها مش زي الأخوات الغلاظ الوحشيين للي بيزعقوا فيا
أنت أحسن معلمة قرآن أصلك صابرة عليا مش زي المعلمات إياه اللي كرهوني في القرآن
أنت داعية تحفة أسلوبك جميل مش زي المنفرين اللي بيقولوا الكلام دب
أنت متواضعة أوي مش زي الأخوات المتكبرين

يا حجة : لا تمدحي أختك بذم الآخرين
فهذا يفسدها ويفسد قلبها
ويغري بينها وبين أخواتها المسلمات جميعا العدواة والبغضاء

اللي أسلوبه حلو مش دايما حلو على طول
والي أسلوبه وحش مش دايما وحش على طول
وأي حد عنده خطأ سواء منتقبة أو بخمار أو بحجاب كلنا كمسلمين مطالبين بإعانته على الخير وعدم عون الشيطان عليه مش مطالبين بقتله وجلده وطرده من رحمة ربنا

--------------------
حكايات الحجة ^_^
- شفتي يا بنتي أل أيه بيحتفلوا بالهالويين!!
- طب مانت بتحتفلي بعيد الميلاد يا حاجة!!
- .................. !!!!!!

===
استخرجي 3 فروق بين استنكارك للهالوين وبين عدم استنكارك لعيد الميلاد
مش هتلاقي فروق فقهية صحيحة

هي بس الصدمة الأولى من الوافد الجديد على معرفتك بأحاديث التشبه وأنه لسة مفيش فتاوى خزعبلية تقر الكلام الفارغ ده
كل ده رشق في قلب فيه من الإيمان ما يدفع هذا الوافد فرفضه

أما عيد الميلاد فطال علينا الأمد فقست قلوبنا وضعفت وخارت قوانا عن استنكاره بنفس الأدلة اللي بنستنكر بيها الهالويين ...
فأشربت حبه خصوصا مع المجتمع وكدة وأن فيه فتاوى والناس والعيال ونفرح وحركات

الحمد لله بعض الضرر والمرارة يستفيق بها صاحبها من سم يجري في عروقه مجرى الدم
أفيقوا يرحمكم الله

كل الشبه بتاعت الاحتفال بالعيد ميلاد - براس السنة - ..الخ
أحب أقول للأخوات كل ردودكم على موضوع الهالويين هو نفس الردود على موضوع العيد ميلاد وراس السنة وخلافه
لا عيد ميلاد ولا هالويين ولا عيد حب ولا غيره
رددي دوما : معتزة بهويتي وإسلامي


 

سارة بنت محمد
  • الأسرة
  • وسائل دعوية
  • درر وفوائد وفرائد
  • تربية الطفل المسلم
  • قضايا معاصرة
  • عقيدة
  • رقائق
  • الصفحة الرئيسية
  • ملتقى الداعيات
  • للنساء فقط